Տյուտորների դպրոցի հանդիսավոր բացումը, Հոգեսոցիալական կարգավորման կենտրոնում

Այսօր հունիսի 30-ին Հոգեսոցիալական կարգավորման կենտրոնում տեղի ունեցավ Ուղեկցող մասնագետի/ Անձնական օգնականի/ Տյուտորների դպրոցի հանդիսավոր բացումը. ներկա էին բազմաթիվ հյուրեր, դպրոցի դասավանդող ուսուցիչներ, տարբեր գերատեսչությունների և հասարակական կազմակերպությունների ներկայացուցիչներ:

Բացման խոսքով հանդես եկան Հոգեսոցիալական Կարգավորման կենտրոնի գիտական ղեկավար Արմեն Սողոյանը, Ռեքավերի Քոլեջի ղեկավար Լիլիթ Բաղդասարյանը և Տյուտորների դպրոցի ղեկավար Հայկանուշ Դիլանյանը: Բանախոսները ներկայացրեցին ուղեկցող մասնագետի դերի կարևորությունը արդի ներառական  հասարակության մեջ, ինչպես նաև անդրադարձ եղավ գաղափարի հղացման պատմությունը:

Դպրոցի ընդհանուր ծրագիրը և դասավանդող մասնագետներին ներկայացրեց դպրոցի ղեկավար Հ. Դիլանյանը: Նա նշեց մասնագետների իրավագիտակցության բարձրացման, էթիկական սկզբունքների պահպանման կարևորությունը` մասնագիտական  տեսական  և գործնական հմտությունների հետ համատեղ: Նախատեսվում է, որ դրպոցի դասավանդողները իրենք կարճ դասընթաց կանցնեն ՀՀ Մարդու իրավունքներ պաշտպանի աշխատակազմի համապատասխան մասնագետների մոտ:

Ուղեկցող մասնագետներներն այսօր պահանջված են հասարակության մեջ սոցիալականացման, կրթության, հաղորդակցման խնդիրների հետևանքով ֆունկցիոնալ կյանք ունենալու դժվարություններ ունեցող երեխաների, դեռահասների և մեծահասակների համար: Նրանց գործունեության արդյունքում այս մարդիկ հնարավորություն են ունենում դառնալ առավել ներգրավված համայնքային կյանքում, իրացնել  կրթության իրավունքը, ունենալ  առավել իմաստալից և հետաքրքրություններին համապատասխան զբաղվածություն և բարելավել կյանքի որակը:

Դպրոցը մասնագետներին թույլ կտա ձեռք բերել գիտելիքներ և հմտություններ տյուտորի/ուղեկցող մասնագետի դերի, հիմնական նպատակների, գործունեության ոլորտների, հաշմանդամություն ունեցող մարդկանց առանձնահատկությունների, նորմատիպիկ զարգացման առանձնահատկությունների, աշխատանքաի ընթացքում ի հայտ եկող տարբեր դժվարություններ հաղթահարելու մասնագիտական գիտելիքների և միջամտություն ձևերի մասին:

Տյուտորների դպրոցի դասերը կմեկնարկեն հուլիսի 7-ին։ Գրանցվել կարող են ոչ միայն հոգեբանները, մանկավարժները, այլ նաև բուժաշխատողները, շահգրգիռ ծնողները, ընտանիքի անդամները և շահագրգիռ այլ անձինք։

Հարցեր, պատասխաններ, մեկնաբանություններ